Балезино ёросысь Быдыпи гуртысь «Ошмес син» вокальной ансамбль. Турнан дыръя быдэстоно кырӟан.
21-тӥ гудырикошконэ 2018-тӥ арын Калык творчествоя Элькун коркалэн ӧнерчиосыныз “Финн-угор транзит” калыккуспо проект улсын гожтэмын.
Васькисько, васькисько Вало но возь кузя,
Чебер чагыр сяськаез, ой, но уччаса.
Чебер чагыр сяськаез, ой, но Ой шедьты,
Ой аӟӟи но яратон, ой, но туганме.
Ой аӟӟи но яратон, ой, но туганме.
Яратон но туганэ туж но кыдёкын,
Сьод кырныж но лобзонтэм сьод нюлэс но сьорын.
Бертоз мынам туганэ, тушмонэз вормыса.
Гадяз орден чиляса, урамез шулдыртыса.
Фольклорной ансамбль П.К. Поздеевлэн бичетаз потэм кырӟанлэсь вариантсэ быдэстэ. Мукет вариантъёсын ӵошатыны ке, таяз яратоно туганэн люкиськон сяна, Быдӟым Отечественной ожгар тема но ӝутӥське. П.К. Поздеевлэн малпамезъя, кырӟанлэн та вариантэз Удмуртилэн уйпалаз ожгар дыръя вӧлмиз, куке со палъёстӥ Ижкар-Балезино чугун сюрес лэсьтӥське вал.