Балезино ёросысь Быдыпи гуртысь «Ошмес син» вокальной ансамбль.
21-тӥ гудырикошконэ 2018-тӥ арын Калык творчествоя Элькун коркалэн ӧнерчиосыныз “Финн-угор транзит” калыккуспо проект улсын гожтэмын.
Кызьы меда лыктӥды? Ӟечесь-а тӥ вуиды?
Чупчи йылысен-а, выжыысен-а?
Гажаса-а, гажатэк-а лыктӥды?
Милемыз тӥ аӟӟем потса вуиды?
Гажаса ке лыктӥды, ӝоггес сиёд-юоды.
Гажатэк ке лыктӥды — уд юэлэ.
Ойдолэ, кумъёс-кумаос, люкаське,
Одӥг кылысь-ымысь вераломе!
Кызьы меда лыктӥды? Зечесь-а тӥ вуиды?
Чупчи йылысен-а, выжыысен-а?
Гажаса-а, гажатэк-а лыктӥды?
Милемыз тӥ аӟӟем потса вуиды?
Уйпал удмуртъёслэн тодмо гурзы. Куно пумитан мадез куно пумитаку но юмшаку быдэсто. Юмшан дыръя быдэс ӝыт но кырӟаны быгато. Кырӟало кызьы ке куно пумитасьёс но, озьы ик куноос но. Корка кузёос юало куноосты, кызьы но кытысь соос вуизы, гажаса-а, мӧзмыса-а лыктӥзы.
Кырӟанын Чупчи шурез но верало. Уйпал удмуртъёслэн вашкала сям-йылолъёсазы но каклыккылосазы Чупчи шур – со калыкез сюдӥсь шур, куноосты вайись шур. Кырӟанын огшоры гинэ уг юаськы, куд палась вуизы куноос: Чупчи йылысен-а, выжыысен-а? Соя валало вал, кинъёс куное вуизы: уйпал вераськетэн вераськись «асьсэ» палъёс-а, яке «палэнысь» вуэмъёс-а.