Удмурт нимыз Эгра, Вужгурт. Эгра – Чупчи шур бассейнысь огез тужгес но вашкалаез но бадӟымез удмуртъёслэн воршуд выжы валчеяськонзы. В. В. Напольских тодосчилэн малпамезъя, воршудлэн нимыз обской угръёсын герӟаськемын – обской угръёслэн перм нимзы коми кылын йэгра, удм. эгра (→ ӟуч. Югра). В. С. Чураковлэн малпамезъя, выжылэн нимыз Эгыр удмурт пиосмурт ним бордысь потэмын, нош пиосмурт ним удмурт эгыр кыл бордысь кылдэмын. Вужгурт: вуж + гурт: Вуж выжы гурт.
Уйпал Удмуртиысь вашкалаез черкогурт. Нырысьсэ гожтыса кельтэмын 1615-тӥ арын Федор Андреевич Звенигородский но Василий Терентьевич Жемчужников воеводаослэн но Михаил Одинцов дьяклэн возьмаськись книгаосысьтызы лыдметын. 1678-тӥ арын калыкез гожъян-чотан книгаын гожтэмын, Игра-над-Лозою гуртын 43 юрт сылэ, 185 мурт улэ.
Черкогуртлэсь нимзэ кык сямен валэкто. Калыкын верало, вашкала дыръёсы удмуртъёс черкогуртлэн али сылон интыезлэсь уйпалагес возьёсы улыны интыяськиллям. Соос пӧлын Бигра нимо узыр мурт вылэм. Бигралэн тӧдьы ошез вылэм, кудӥз ошмес син доры ву юыны ветлыны дышем (со ошмес син али но вань, автовокзаллы ваче пумит). Соин ик ошмес синэз дун-чылкыт ниманы кутскиллям. Ошмес син доры Бигра но гуртоос улыны кариськиллям. Нош кылдэм гуртэз Бигра нималлям, но ӟучъёслы та нимез капчигес Игра шуыны вылэм.
Кыкетӥез мадёс удмурт гожъяськисьлэн Кедра Митрейлэн «Дитя больного века» книгаысьтыз кутэмын. Мӧйыос верало, пе, черкогуртлэн али сылон интыяз азьло номыр вылымтэ. Игра кылдэм Сибирской трактлэсь иськемын сылӥсь Кузейлуд гуртысь вуэмъёсын. Кузейлудысь Мадей семья Эгра выжыысь вылэм (Мадей – Кедра Митрейлэн песятаезлэн атаезлэн атаез).