1710-тӥ арысь Ландратской калыкез гожъян-чотанын Дери-Чюдья, Завьялово шуыса гожтэмын. Удмурт нимыз Дэри, Дэри-Чюдья. Завьялово нимыз ас ним бордысь кылдэмын: Завьял ˂ ӟуч. завяло – катьтэм адями + -ово – ӟуч аффикс; Дэри-Чюдья: Дэри – шурлэн нимызъя + Чудья (Шудья) – воршуд выжы ним: ʻДэри шур дурын Завьялэн кылдытэм Чудья воршуд выжылэн гуртэзʼ (удмурт калыккылосын Завьял-батыр вань).
Кылдэм дырыз тодмо ӧвӧл, но калыкын верало, черкогурт Ижкарлэсь 100 арлы бадӟымгес. 1710-тӥ арысь Ландратской калыкез гожъян-чотанын пусъемын, гуртын 55 юрт сылэ вылэм, озьыен, со лымшор но шор Удмуртиын тужгес но бадӟымез гурт вылэм. Нырысетӥ улӥсьёс Кильмезьлэн бассейнысьтыз Гозек-Шудья гуртысь (туала Кировской улосвылысь Кильмезь ёросысь) вуэмын вал, дыр [Атаманов 2015: 294].