Нырысьсэ гожтыса кельтэмын 1579-тӥ арын Писцовой книгаын: перм крестьянъёс та палъёсы тросэн пегаллям шуыса.
XVII-тӥ даурын бугыръяськон вакыт бере сыӵе книгаос нуисько вал огъя югдурез валан понна. Отын озьы ик гожтыса кельтэмын Сарапулка шур дурысь Вознесенское черкогурт. Шурлэн нимыз сарапуль кыл бордысь потэмын, дыр. Чуваш кылын сарапуль ʽӵуж чорыгʼ – со стерлядь, дуно промысловой чорыг.
Мукет малпанъя, Сарапул «ву дурысь гурт» шуэмез возьматыны быгатэ: коми кылын сардиз яке удмурт кылын зарезь вуэз возьматэ, нош павыл – со ʽпоселок, каргуртʼ. Вунэтоно ӧвӧл созэ но, Сибирь палась ёросъёсын сара шуо вал уксёез, нош пул – со векчи ыргон копейка, кудӥз сярысь огаз тодмо киноын шуо: «Сколько в кружке? Ни одной полушки!».
Куинетӥ малпанъя, карлэн нимыз манси саранпауль ʽкоми гуртʼ кыл бордысь пӧрмемын.
Кам дурысь Удмуртие – Сарапул-Каракулино-Вотка палъёсы – ӟучъёс XVI-тӥ даурлэн пумаз гинэ вуизы ай, отчыозь та интыосын башкиръёс улӥзы, соослэсь азьло – удмуртъёс, кудъёссэ ӟучъёс чудь нимало вал. Сое вашкала удмуртъёс бере кылем Ананьинской, Пьяноборской, Мазунинско-Бахмутинской лулчеберет археологи синпелетъёсъя валаны луэ.
Росси гуртъёслэн но каръёслэн нимъёссы ӵемысь черкъёс бордысь пото. Озьы Сарапулэн но вал. Нырысь со черклэн нимызъя Вознесенское нимамын вал. XVII-тӥ даурын Вознесенское огез валтӥсь пункт луэ, со пыр сюресъёс «Сибирь сюресъёсы» вутто вал. 1780-тӥ арын Сенатской указ бере Сарапул Сарапульской уездлэн центрез луэ. Табере со черкогурт гинэ ӧвӧл, со – уездной кар!
Ар ортчыса, Сарапуллэн аслаз кар кунпусэз. Кунпусысь изкар Россиез утисьёслэсь кужымзэс возьматэ. Собере Екатерина II Сарапулэз Вятской наместничествоен ӵош азинтон сярысь план юнматэ, сое улонэ пыртэ Иоганн Лем архитектор. Но 1796-тӥ арын Вятской наместничество Вятской губерния луэ. Нош Сарапул солэн уездной центрезлы пӧрме.
1917-тӥ арын кутскем революцилэсь азьло Сарапул – огшоры купеч кар, кудаз 155 купеч улэ вал. Тросэз нянен вузкаро вал, озьы ик ку поттӥсь, майтал пӧзьтӥсь но трос мукет предприятиос вал. Революция бере Сарапулын Удмурт комиссариат кылдэ. Кивалтэ соин И.А. Наговицын. Али Сарапулын кӧня ке бадӟым промышленной предприятиос вань: АО «Сарапульский радиозавод», АО «Элеконд».