Удмурт нимыз Сьӧлта: гуртэз Кильмезь-Сьӧлта (Кильмезь – гидроним) воршуд выжыысь потэм мурт кылдытэм.
Гуртлэсь нимзэ мукет сямен но валэкто:
1) Та палъёсын трос возьёс, азьло отын валъёс турын сиё вал. Валъёсты уйин но возьёсын возьмало вал, нош медаз пегӟе шуыса, пыдъёссэс гозыен, сьӧлтэтэн думыло вал.
2) Тросэз нимъёс инкуазен но интыосын герӟаськемын. Кылсярысь, Сьӧлталэн огез люкетэз (Ленина ульча) азьло Жайгил нимаське вал, малы ке шуоно гурт Жайгилка шур дурын интыськемын вал (оло: жаг + йыл). Черкогурт пыр ортчись Палвайка (пал + вай) шур кузя (берлогес ӟучъёс шурез Балалайка шуыны кутскизы) инкуазь арбериосын жагмем интыос кылдӥзы: вайёслэсь, тылобурдо тылыослэсь, кырсьлэсь но мк.
3) Та интыосын Бурсин но Сьӧлта вотской батыръёс улӥллям. Чупчи батыръёс сярысь уйпал удмуртъёслэн вашкала мадёсъёсазы вераське, соос ӵемысь сьӧлтакар батыръёсын ожмасько вал шуыса. Озьы ке, оло, Сьӧлта выжыысь батыръёс калмезъёс вал, но Чупчи доры кытысь ке палэнысь вуизы.
Нырысьсэ гожтыса кельтэмын 1710-тӥ арын калыкез гожъян-чотанын: Калмез-Селта Арской улосэ пыре вал, нырысетӥ улӥсьёс татчы 1596-тӥ арын вуэмын. Со аръёсы тужгес но бадӟымез удмурт гурт вылэм, отын 56 юрт лыдъямын.
Аръёс ӵоже черкогурт трос пол нимзэ вошъяз: Сьӧлта, Сельта яке Культемстяны, Селта яке Кожиль-Селты, Кильмезь-Селта гурт, Селты черкогурт, Селты кар [Атаманов 2015: 703].