Революцилэсь азьло нимаське вал Сюмси-Можга: Сюмси – шур ним: сюм ʻсюм, вукожʼ + си – топоформант, азьло ʻошмес синмысь потӥсь пичи вуʼ верамез возьматэ вал + Можга – воршуд выжы ним: ʻСюмси шур дуры интыяськем Можга воршуд выжыысь потэмъёслэн гуртсыʼ. Черкогурт шурлэн сюмысь потон интыяз сылэ.
Сюмси – паськыт вӧлмем Можга воршуд выжылэн огез вашкалаез улон интыез. Сюмсиысь потэмъёс Кильмезь шурлэн быдэс бассейназ улыны интыяськемын, тужгес но трос Валалэн вайшуръёсыз кузя. Ижозь вуэмын, Закамьеысь башкир музъемъёс дорозь но оренбург кыралъёс дорозь. Но та калыклэн одӥг но пытьыез шедьтэмын ӧвӧл Удмуртилэн уйпалаз, Чупчи шурлэн бассейназ.
XIX-тӥ даурлэн кутсконаз Сюмси-Можгае нырысетӥ ӟучъёс вуо, нош удмуртъёс, асьсэ выжы карзэс кельтыса, мукет удмурт гуртъёсы но мукет улосъёсы улыны кошко [Атаманов 2015: 747-748].