д. Выль-Пашур Шарканского района УР
Информатор: Поткина Татьяна Федоровна, 1928 г. р., ур. д. Табанево Шарканского р-на, в наст. время живет в д. Выль-Пашур, образ.7 кл.
Запись: Варламова Наталья, 2005 г. [Фольклорный архив Удмуртской филологии (ныне Институт удмуртской филологии, финно-угроведения и журналистики) Удмуртского государственного университета, фонд контрольных работ 2005, л. 5–6, Варламова, н. р. Шушакова Г.Н.]
Улӥллям-вылӥллям пичи гуртын атайзы, анайзы, нылзы но сюрнылзы. Анайзы сюрнылзэ адями радэ трос ик ӧвӧл поттылэм. Ялан урод кылэн гинэ «сюдэм».
Огпол нылъёс губи октыны мынӥллям. Сюрнылзы, пе, быдэс куды октэм ни, нош яратоно нылзы тэк пуке, сяська зынъя. Сюрныл солы но кудыяз октӥз.
Бертыкузы пумиськиллям коньыен. Курем со нылъёслэсь губизэс. Сюрныл сётэм, нош сузэрез ӧвӧл. Мынӥллям азьлань. Пумиськиллям ӟичыен, таиз но губи куриз, таизлы но сюрныл сётӥз. Бератаз пумиськизы на гондырен. Та пӧйшурлы но губизэ сётӥз.
Виуз сюрныл гуртаз буш кудыен, нош сузэрез – губиен тыр. Туж трос лек, тышкаськон кыл кылоно луиз сюрныллы.
Одӥг нуналэ таослэн пичи пу юртсы тылэн гомаз. Кылизы соос юрттэк. Вуиз таослэн гуртазы узыр егит пи. Атаез утча вал солы кузпал. Но куанер семьяысь нылэз солэн кутэмез ӧз поты, тазьы шуиз:
– Кин самой узыр приданой сётӥз, солэсь ик нылзэ кен каро!
Асьсэ яратоно нылзы понна анай-атаен номыр сётыны ӧз быгатэ. Нош сюрнылзы доры вуизы гондыр, ӟичы но коньы. Гондыр туж трос пӧйшур куос ваиз, ӟичы – туж трос тылобурдо, коньы – губи, пӧртэм емыш.
Озьы сюрнылэз кенэ кутӥзы. Шудо но буро улонэз солэн кутскиз.
Валэктон:
Выжыкыллэн мадёнэз дунне вылын туж тодмо калыккуспо «Сюрныл но сюранай» сярысь сюжетъя кылдэмын. Та сюжетъя выжыкылъёс кылдо кык люкетъёслэсь-эпизодъёслэсь. Нырысь люкетаз сюрныл одно ӟече потэ аслаз умой сямъёсызлы луыса, кузьым басьтэ, нош кыкетӥ эпизодын сюранайлэн нылыз, кузьым басьтэм интые, аслаз урод сямъёсызлы луыса, я уродэ кыле, я воксё но быре.
Таиз удмурт выжыкыл аспӧртэмлыко луэ национальной тодметъёсыныз. Ваче пумит пуктэмын сюрныл но яратоно нылзы. Яратоно нылзы – азьтэм, кӧттырмостэм, нош сюрныл ужась но ӟеч сямо, со губи бича аслыз но яратоно нылзылы, бертыкузы аслэсьтыз бичам губизэ жалятэк сётэ коньылы но, ӟичылы но, гондырлы но.
Лякыт сямыз понна сюрныллы пӧйшуръёс ваё ваньбур-пирдан/йырдун, но сое кышно басьтэ узыр егит пи. Нош яратоно нылзылэн атай юртсы ӝуаз но, номыртэк кылизы, соин йырдун сётыны немаин вал ни. Озьы, яратоно нылзы уродэ кылиз.