д. Табанево Шарканского района УР
Информант: Широбоков Владимир, 1970 г. р., местн.
Запись: Сидоров Валера, Березкина Зинаида, 1983 г. [Фольклорный архив Удмуртской филологии (ныне Институт удмуртской филологии, финно-угроведения и журналистики) Удмуртского государственного университета, фонд экспедиций 1983, дело № 12, тетр. № 2, л. 35]
Одӥг кышномурт мужиксэ пу дуре ыстэм. Пиосмуртэз нюлэскы вуэм но кызьпуэз кораны кутскем. Но кызьпу шуэм: «Тон, пересь, монэ эн кора, мон тыныд котьма сёто».
Пересь гуртаз бертэм, нош кышноез тышкаськыны кутскем, малы, пӧй, пу ӧд вайы. «Али ик пу вай, ӧд ке вайы, гуртэ путэк эн берты». Пересь мынӥз нюлэскы, но кызьпулы шуэ: «Пу вайны косӥзы». Гуртаз со бертӥз шумпотыса. Дораз вуиз но, азбарын тыраз пу. Табере пересь косӥз пызь вайны: «Пызь гуртын ӧвӧл ни, немае сиыны».
Пересь нош ик кызьпу доры мынӥз. Кызпулы со шуиз: «Кышное пызь вайны косиз». Гуртаз бертӥз, пыриз но ларын тыраз пызь. Кышноез пересьлы шуиз: «Малы со мында пызь ваид? Мын али ик кызьпуэдлэсь кык шыкыс зарни кур».
Пересь мынӥз нюлэскы кызьпу доры: «Кышное куриз кык шыкыс зарни».
Пересь гуртаз бертӥз но адӟиз: кышноез укно дурын коньдонэн шудыса пуке. Пересь шуиз: «Ойдо кытчы ке пыдло ватомы».
Кышноез шуиз: «Мын нюлэскы ветлы кызьпуэд доры, мед милесьтым адямиос кӧшкемалозы». Пересь кызьпу доры ветлыса вераз кышноезлэсь куронзэ. Собере гуртаз бертӥз но, кышноеныз кыкназы ик гондыръёс луизы.
Валэктон:
Выжыкыл кылдэмын паймымон юрттӥсь сярысь выжыкыл сюжетъя, кудӥз тужгес тодмо луэ А.С. Пушкинлэн «Чорыг но чорыгась сярысь» литературной выжыкылэзъя.
Удмурт выжыкыл сюжет туж вакчи гинэ, мадён ӝикытак быдэстэмын, паймымон юртӥськисез луэ кызьпу. Кызьпу куремъя, пересь уг кора, уг ӵогы сое, пунэмзэ, мар курод, сое сёто, шуэ кызьпу. Выжыкылын вань кӧттырмостэм кышномуртлэн образэз, кудӥзлы номыр уг тырмы, пызь но, пу но. Со куре на кык шыкыс зарни, и кылдэ солэн кык шыкыс зарниез.
Тунсыко луэ берпуметӥ люкетэз, кытын кызьпулэсь кышноез курыны косэ, мед, пе, ваньмыз соослэсь кышкалозы, зарнизэс медаз лушкалэ шуыса. Зэмен но, кык пересьёс пӧрмо гондыръёслы.
Удмурт фольклорын вань на та сюжетлэн мукет вариантэз, кытын кызьпу интые, беризь пумиське. Ӵапак со вариантэз вылэ пыкиськем удмурт кылбурчи Кузебай Герд (Кузьма Павлович Чайников) «Гондыръёс» литературной выжыкылзэ кылдытон понна.