д. Выль-Пашур Шарканского района УР
Информант: Варламова Анна Александровна, 1934 г. р., ур. д. Быги Шарканского р-на, в наст. время живет в д. Выль-Пашур, образ.7 кл.
Запись: Варламова Наталья, 2005 г. [Фольклорный архив Удмуртской филологии (ныне Институт удмуртской филологии, финно-угроведения и журналистики) Удмуртского государственного университета, фонд контрольных работ 2005, л. 5–6, Варламова, н. р. Шушакова Г.Н.]
Одӥг солдат, пе, гуртаз службаысь бертэ. Кузь сюресэз ӝужыт гурезьёс, пеймыт тэльёс вискытӥ ортче.
Тӥни озьы одӥг пеймыт тэле пырем но йыромем. Пичи, турынэн будэм сюрес потӥз, со вуттэм туж чебер, пужыятэм ковёр кадь, возь вылэ. Кытын, пе, сылэ бадӟым дворец. Туж трос адямиез адӟем но пӧлазы вамыштэм. Калык пӧлысь кылэм, эксэй, пе, ӝыны царствозэ сётоз солы, кин сутскисьтэм пу шедьтоз дворец выльдыны.
– Ойдо, мон мыно. Ванезлы шум уг поткы, ӧвӧлэныз уг куайы.
Та нуналэ ик мынэм эксэй доры но верам мылкыдзэ. Ӝоген солдат нош сюрес вылэ потэм. Шунды туж зол пиштэ, сюрес вылад саюл инты но ошмес ӧз ке шедьы, воксё пушмод. Тани со кесяськем куара кылӥз. Кызъёс пӧлтӥ потыса учке но, дыдык четлыке шедем. Солдат ширтыса мынӥз отчы. Матэ вуиз но дыдык интыысь туж бадӟым лопыръяськыса кырныжез адӟиз. Собере тыпак дугдӥз но сылэ.
– Лэзь монэ, юлтоше, – шуэ кырныж.
– Мар понна мон тонэ, шӧйвыл кокчаськисез, лэзём?
Бӧрысь солдат адӟиз, кырныж улаз дыдыкез зӥбыса возе шуыса. Пу кораны кутэм тӥрзэ поттӥз но ӵогиз кырныжез. Дыдык со понна солы мусур сётӥз.
– Сильтӧллэн но гудырилэн мында кужым кулэ луиз ке, ю та мусурез, – шуиз тылобурдо, – юыны быгатӥськод сое куинь пол гинэ. Бӧрысь со магической кужымзэ ыштоз.
Солдат азьлань вамыштэм. Ӧжытак мыныса, ӵын зын кылэм. Со зынъя мынэм-мынэм но адӟем: сизьым йыро дракон тэлез сутыны выре, но куд-ог писпуос уг сутско, уг сётско тыллы. Солдат шумпотэм, сутскисьтэм пу шедьтӥз шуыса. Мусурзэ поттэм но юэм. Вань кужмысьтыз шонскем но драконлэсь огполскын вань йыръёссэ ӵогем. Собере, озьы ик мусур юыса, коръёсты погыртэм. Берпумзэ дыдыклэсь кузьымзэ юэм, со коръёсты дворец доры кыскыса ваем. Со понна эксэй туж шумпотэм. Ӝыны царствозэ солдатлы сётэм. Озьы, солдат сюрес вылысь потатэк, ас шудзэ шедьтӥз.
Валэктон:
Выжыкыл жанрезъя паймымон выжыкыл сюжет луэ. Валтӥсь героез – солдат, огез тужгес но ӵем пумиськылӥсь выжыкыл герой. Солдат ӟеч уж лэсьтэ: кырныж улысь шуге-леке шедем дыдыкез мозмытэ, нош со понна дыдык солы паймымон мусур кузьма.
Мусурез юыса, солдат сизьым йыро драконэз вие, эксэйлэсь сётэм секыт ужзэ быдэстэ: солы дворец лэсьтыны ӝуасьтэм коръёс вае. Со понна эксэй солдатлы ӝыны эксэйлыксэ сётэ.
Та выжыкылын пумисько ваньмыз сямен паймымон выжыкыл геройёс, кудъёсыз сярысь гожтэ В. Я. Пропп «Морфология сказки» но «Исторические корни волшебной сказки» ужъёсаз: валтӥсь герой, ыстӥсь герой, юрттӥсь герой, кузьмаськись герой но тушмон-герой. Ӧвӧл кышно яке вылькен луись героез гинэ. Валтӥсь геройлэн кылдэ паймымон юрттӥсез – дыдык, кудӥз солы сётэ кузьым – паймымон юон-мусур. Ӵапак паймымон юонлы луыса, солдат быдэстэ эксэйлэсь сётэм ужзэ, ворме сизьым йыро драконэз, но вае дворец лэсьтыны ӝуасьтэм коръёс. Солдат вормисе потэ но ӝыны царство басьтэ.