д. Б. Кибья Можгинского района УР, Баранова Галина Сергеевна, 1956 г.р., живет здесь же, образ. 10 кл.
Зап. Алексеева Снежана, 2018 г. [Фольклорный архив Удмуртской филологии (ныне Институт удмуртской филологии, финно-угроведения и журналистики) Удмуртского государственного университета, фонд контрольных работ – 2018, н.р. Шушакова Г.]
Вал со где-то в 1930-х годах, до войны вал, дыр, со. Бабалэн мамезлэн братэз кышноясъкем, пе. Мар луыса со кулэм… Андрей шуо вал сое. Табере кышноез кылем. Горд бородкаез вал солэн ещё. Нылпиосыз но кык кузя кылемын. Уло вал бабаосын ӵош. Табере шӧдӥськом весь, пе, кинэн ке но верасъке. Сэндраын, пе, кӧла вал. Одӥг уй кӧлӥзы. Ньыльдон уез дорозь улӥллям, лэся, ини соос. Табере бусые араны, пе, потӥллям – метеор кадь, пе, кошке ми азьын. Туж шаплы, пе, ара огназ и весь вераське кинэн ке но. Табере юаськом ини, пе:
– Кинэн вераськиськод?
Со шуэ:
– Нокинэн но уг. Огнам, ас поннам.
– Бон кызьы-о сыӵе шаплы араськод? — баба, пе, мон но зол арасько вал но…
Со вера:
– Дак Андрей ветлэ мон доры араны, кыкнамы араськом.
Нош нокинэ ум адӟисъке. Табере уйин, пе, изиськом, но нош вераське. Андрей, пе, шуэм, монэ тыбыртӥм эн зыгыръя, пе, шуэ. А чёрт-то, тыбырыз ӧвӧл ук солэн! Сыӵе ик, пе, адями.
Табере мукет уяз ини, мон, пе, тӥледлы салам вайи – сакыр. Чуланады, лар вылын сакырьёс тырыса, пе, келътӥ (Андрей шуэм – Г.Ш.) Табере, пе, со кышномурт шуэ ини, Лиза вал кадь нимыз: «Айдате-ко, Андрей наш сахар принёс». Дед Ермолайлы, пе, шуэм, мед батько выйдет. Потӥллям но чуланазы – уд оскы! — куинь кузя пиосъёс мырдэм со изэс ӝутыса поттӥллям. Ӝутны, пе, ум вормисъке!
Табере мар карыны? Пришлось черкысь попез ӧтьыны. Корказэс вӧсятӥллям ини. Пукиськом, пе, ӝыт сиськыса, а азьло укноос, пе, лапегесь вал. Как, пе, сётӥ-ӥ-з! Ой-ой-ой, мар-о таӵе та?! И пичи укное мычиськем но: «А-а-а! Догадались!» – шуэм. Точно копия, пе, со Андрей. Бородаез но, пе, сыӵе ик. С тем концом больше ветлымтэ ни. Чёрт, ма кин-о шайвылысь лыктоз?! Вот, адями кулэ ке, мӧзмыны кутскиськод ке, шайтанъёс ерыны кутско.
Валэктон:
Сюжетлэн сӧзнэтэз паськыт луэ. Мадён мынэ зэмос ишан-мадь жанрлы тупась радъя: мадись вераназ чӧлске зэмос тодмо адямиос вылэ, нимъёссэс вера. Сюжет кылдэмын калыкын паськыт вӧлмем оскытэт вылын: адями туж куректэ ке матысь адямиез кулэм бере, со доры ветлыны кутске чёрт матысь адямиезлэн тусыныз. Ӵемгес озьы ветлэ кулэм картэз кышноез доры.
Тани та текстын но кышномурт пумита картсэ, вераське соин. Чёртлэн одно кыӵе ке но тодметэз луэ, кудӥзъя сое тодмало. Соослэсь вераськемзэс кыло, уйин ветлӥсь картэз кышнозэ тыбыртӥз маялляны уг лэзьы, уго солэн тыбырыз вылымтэ.
Удмурт ишан-мадьёс ӵемгес луо вакчиесь гинэ, одӥг сюжетной ядролэсь кылдо. Нош таяз текстын сыӵе сюжетной гердэз куинь луэ. Пумыз тунсыко йылпумъяське: чёртэз шараяло, улляло. Со зол-зол ӟуч кылын кеськыса но шарк! укное шуккыса кошке: «А-а, догадались?!».
Урод кужымез улляны быгато попез вайыса, корказэс вӧсяса.